Read English version
Nna chiddi tempi si sulia stilari
c’a na culonna si tinìa attaccatu
quann’a qualcunu s’avia di flaggellari.
U stessu cu Gesù hannu operatu:
nta na culonna cu vari strumenti
l’hannu di capu e pieri fraggellatu.
E un sordatu sulamenti
virennulu riduttu in tali statu
riprisi a chiddi timirari genti.
Perfilio si chiamava stu surdatu
e vosi a Gesù li cordi tagghiari
cu la medesima spata c’avia mmanu.
Quasi mortu Gesù vinni a cascari
e chidda turma di dd’iniqui genti
pinsaru di vulillu incoronari.
Cci misiru pi ricchi vistimenti
una purpura russa d’un surdatu
e una curuna di spini puncenti
Pi scettru ‘nta na manu cci hannu datu
una canna e ‘nta na pietra l’assittaru
fincennulu per Re in tronu alzatu.
In ginucchiuni e ‘nginocchiu gridaru:
“Diu ti salvi o re di li giudei!”.
E tutti nna la facci cci sputaru.
Secuta San Giovanni ca l’Ebrei
ancora un si nn’avianu saziatu
a li so vogghi spiatati e rei.
“Saria di giustu ca sia libiratu”.
I sacerdoti si misiru a gridari.
“Crucifiggilu! Ncruci av’a spirari”.
Viva Gesù binirittu!
(Rosario Salerno e Angelo Cangelosi, 1970)