Read English version
O picciridda chi jochi sirena
ti l’hannu dittu quantu patri teni?
unu ti fici e ‘ngalera stani
e prima di trent’anni fora un veni.
To matri era carusa quannu t’appi
la levatrici dissi unn’arrinesci
ca comu ci la fici, mancu sappi
chista è la vita, cu mori e cu nasci.
Di nomu ti chiamaru Margarita
ti vattiau li capuburgata
a vidilla parìa rosa di sita
e ‘nveci era ‘na canaglia nata.
La scola la facisti e fu la strata
ti fici di maistra Margarita,
carzaru, malatia, miseria antica
li cosi chi ‘mparasti già di nica.
Oh Margarita, oh Margarita nica
tantu è lu mali ca un basta na vita
pi riparari l’abusu e lu dannu
chi t’hannu fattu e chi ancora ti fannu
Oh Margarita, oh Margarita nica
tantu è lu mali ca un basta na vita
pi riparari l’abusu e lu dannu
chi t’hannu fattu e chi ancora ti fannu.