Read English version
S’arricunta ca la mamma di S.Petru era avara abbramata, ‘un facia ilimosina mai, ‘un dava mai un granu. Ora ‘na jurnata stava munnannu li porri; ‘ncugna ‘na puviredda: – “Mi la fa la caritati, divutedda?” – “Tutti ccà hannu a veniri!…. – Pigghiàti ccà!” e cci detti ‘na sfogghia di porru.
Lu Signuri si la chiamò all’atra vita, e la mannò a lu ‘nfernu. San Petru era capu di lu Paradisu; ‘na jurnata era davanti la porta; quannu senti ‘na vuci: – Ah! Petru figghiu miu! e vidi comu m’arrustu! E va nni lu Maistru, e parrici pi farimi nescìri di sti guai!”. San Petru va nni lu Signuri e cci dici: – “”Maistru haju a me’ matri ca è nta lu ‘Nfernu e voli la grazia pi nesciri””, Si vota lu Signuri: -“”Te’! to matri ‘un fici mai un ugni di beni; tuttu lu so’ piattu di forti è na sfogghia di porru chi detti a ‘na puviredda. – La fai affirrari ccà a sta sfogghia (e cci pujiu ‘na sfogghia di porru), e ti la porti ‘n Paradisu.
Calò un Ancilu cu dda sfogghia: – “afirrativi ccà!”” La matri di S.Ptru si cci affirrò. A lu nesciri di lu ‘nfernu tutti l’armuzzi ch’erunu cu idda si ci affirraru a la pudia di la vesta. Chi nn’avia a fari idda? tantu pirtantu l’Ancilu si li tirava a tutti. Mai! l’abbramata a chi era ci metti a dari caùci, e a scutulàrisi la vesta pi falli cadiri. Comu fa accussì, si rumpi la sfogghia di lu porru e iju cchiu a lu funnu di lu ‘nfernu. E chistu è lu cuntu di la mamma di S. Petru.